Es is moi wieder soweit!
Wia'st aus der Einladung scho erfahren hast, feier i des Jahr mein 60. Geburtstag!
Und wia scho an mein' 40. und 50. Geburtstag, möcht i aa desmoi wieder mit an Maschgara-Fest feiern. Tradition muass sei!
Auf dera Seit'n findst ois Wissenswerte. Falls no Fragen offen san, hau mi einfach o!
Motto
Mittlerweile woass eh a jeder, dass bei meine Maschgarafeste oiwei Maskenzwang herrscht! (Eh klar!)
Des Jahr steht des Fest unter dem Motto "Fantasy Night", oder "Wer is Dei Idol?". Im Prinzip is ois erlaubt, nur unverkleidet deaf natürlich neamt kema.
Vielleicht find'st ja an Frodo oder an Harry Potter toll. Dann nix wia los und leg Di o! Oder werd's vielleicht a Held aus Deiner Jugend sei? Da Michel oder de Pippi? Leg los! I bi scho g'spannt!
Oder vielleicht doch liaba a Superheld? Was is Dei Superpower?
Es waar natürlich wieder super, wenn der oa oder andere mit an Fahrzeug oder sonstigen passenden Utensilien auftaucha daad. I denk oiwei no gern an de Piratenschiffe, den Planwagen, de Tin Lizzy oder des Tretmobil von de Feuersteins!
Termin
Der Termin ist am 23.Juli 2022 beim Festplatz in Lenthal. Parken duast bitte oben beim Bauernhaus so wia's beschildert is. Aber bitte mit Sinn und Verstand, damit da Hausherr net sauer werd!
Des Fest fangt wia oiwei um 18:00 Uhr o. Wenn möglich, sei bitte pünktlich, weil mia ja s'Essen net kalt werden lassen woll'n!
Ausweichtermin
Falls s'Wetter am 23. Juli net passt, verschieb'n ma auf'n 30. Juli 2022. Darüber informier i Eich rechtzeitig auf dera Seit'n unter "Aktuelle Informationen".
Auf jeden Fall schadt's net, wenn'ts für a scheens Wetter a Kerz'n okennt's und/oder a Stoßgebet zum Himmevater schickt's!
Verköstigung
Z'Dringa und z'Essen gibt's wia oiwei gnua, und natürlich hamma aa wieder a groß Feuer.
Musik
Natürlich bau'n ma aa wieder a g'scheide Musikanlag auf, damit ma uns de guad'n oid'n Rocksongs einiziang und dazua Tanzen kinan. Endlich amoi wieder!
Aber natürlich net nur Rockmusik, sondern ois, was ma damals halt so g'hört hat, wie NDW, Oldies und vielleicht da oa oder ander Schlager. Musikwünsche san herzlich willkommen!
Ab ca. 22:00 werd dann überwiegend Rock in fast alle Variationen g'spielt.
Alle, de koan Bock auf Rock ham (so Leit soll's geb'n!), kinan se g'müatlich an's Lagerfeuer setzen oder des scheene boarische Voralpenland genießen und a Bierchen oder sowas tringa. Der Rest kon im Zelt tanzen und headbangen bis da Doktor kommt.
Corona
I möcht natürlich net, dass im Nachgang alle Leit krank im Bett liegen, de Party aufg'löst werd oder dass i unserm Staat a Spende zuakema lassen muass. Deswegen muass i leider auf de gültigen Coronaregeln besteh und bitt Eich herzlich, des Ganze ernst zu nehma. Auf jeden Fall werdn de gültigen Regeln kontrolliert. Oiso, Impfnachweis mitbringa! Duat ma leid!
Für den Fall, dass i des Fest kurzfristig absagen muass, gib i Eich aa rechtzeitig B'scheid! Aber da möcht i net amoi dro denga.
Auf und Abbau
Für'n Auf- und Abbau werd'n wieder fleißige Hände g'suacht. Der Aufbau vom Zelt, der Bar usw. findt am Freitag den 22.07. ab 14:00 Uhr statt.
Der Abbau is am Sonntag ca. ab Mittag (abhängig von der Stimmung) und am Montag aufnacht.
Fall'st Zeit und Lust zum helfen hast, bin i um jede helfende Hand froh. Bitte gib mir B'scheid, wenn'st mithelfen magst.
Danke!
Übernachtung
Für alle Auswärtigen: Der Festplatz is mitten in der Pampa, mindestens 5 Kilometer bis zum nächsten Dorf. Erfahrungsgemäß is de Erreichbarkeit von Taxis, b'sonders zu späterer Stund, eher schwierig.
I möcht auf koan Fall, dass oana von Eich b'soffn Auto fahrt, an Führerschein verliert oder schlimmstenfalls an Unfall baut!
Deswegen schlag i vor, dass Eich a Zelt, an Schlafsack und evtl. a Feldbett mitnehmt's und glei vor Ort übernacht's! Was is romantischer, als die Nacht am Busen der Natur zu verbringen? Und möglicherweise werd de Nacht ja aa ziemlich kurz.
Natürlich is aa jeder Dasige herzlich willkommen, de Nacht vor Ort z'bleibn.
Frühstück
I möcht am Sonntag in der Friah Weißwürscht und Brezen organisieren. Dann kimma glei nahtlos weitermacha. A Grund mehra, da z'bleibn!
Leit, i g'frei mi scho! Es hoffentlich aa! Sollten no Fragen offen sei, haut's mi einfach o!
